Navis hefur tekið að sér að hanna og að hafa eftirlit með breytingum á 120 metra löngum togara, Maestro, fyrir suður Kóreska útgerð. Gert er ráð fyrir að eftir breytingar muni togarinn stunda uppsjávarveiðar á hestamakríl (horse mackerel) og öðrum uppsjávarfiski við vestur Afríku og hugsanlega í Kyrrahafinu líka. Með breytingunum er afkastageta skipsins aukin, meðal annars með því að stækka fiskmóttöku og að auka verulega frystigetu. Navis hefur áður hannað sambærilegar breytingar á fleiri skipum af svipaðri stærð. Þessi skip, sem stundum eru kölluð súper togarar, voru upphaflega hugsuð sem verksmiðjuskip með frystingu og bræðslu og sum þeirra voru jafnframt með niðursuðuverksmiðju um borð. Útgerð þeirra reyndist hins vegar þung og óhagkvæm.

„Við höfum mætt samdrætti hér heima með auknum verkefnum erlendis og gengið það vel. Nú erum við með nokkur verkefni utan landsteinanna og til að mynda stór verkefni í Japan og Argentínu en á síðarnefnda staðnum vorum við með menn í eftirliti með breytingaverkefni allan fyrri hluta vetrar til loka janúar á þessu ári,“ segir Hjörtur Emilsson, framkvæmdastjóri Navis í Hafnarfirði, sem sérhæfir sig í skipatengdum verkefnum á sviði hönnunar, ráðgjafar og eftirlits.

Um þessar mundir fara fram tilraunir með að nota efnarafal til raforkuframleiðslu um borð í norska skipinu Viking Lady, sem er birgðaflutninga- og þjónustuskip fyrir olíuborpalla. Þetta er í fyrsta skipti sem slík tilraun er gerð um borð í flutningaskipi og er Navis meðal fyrirtækja sem tekið hafa þátt í verkefninu. Að sögn Karls Lúðvíkssonar verkfræðings sá Navis um að hanna gám utan um rafalinn með öllum öryggisbúnaði, loftræsti-, lyfti- og flutningsbúnaði. Þá hannaði Navis undirstöður og kom að ýmsum atriðum varðandi fyrirkomulag um borð.

Meðal verkefna sem Navis vinnur að fyrir Siglingastofnun Íslands er rannsókn á loftgæðum um borð í íslenskum skipum. Þessi rannsókn hefur staðið um nokkurt skeið en kveikjan að því að ráðist var í hana eru niðurstöður kannanna sem gerðar hafa verið undanfarin ár á heilsufari sjómanna og vélstjóra sérstaklega, bæði hér á landi og í öðrum nálægum löndum. Þessar kannanir hafa meðal annars bent til þess að þeim sem vinna í vélarúmi og starfa við vélstjórn sé hættara við að fá krabbameini en öðrum. 

Navis er meðal þátttakenda á Færeysku sjávarútvegssýningunni Fish Expo Faroes 2009 sem haldin er í Þórshöfn dagana 26.-29.maí.

Í byrjun apríl var samið um Navis taki að sér að hanna breytingar sem gerðar verða á togaranum Echizen Maru, en hann er 90 metra frystitogari sem gerður er út frá borginni Ushuaia syðst í Argentínu. Breytingarnar fela meðal annars í sér að settar verða niður tvær nýjar togvindur sem búnar eru átaks- jöfnunarkerfi (AutoTrawl), tvær netatromlur, sextán hjálparvindur, bobbingarennur fyrir tvö troll, stæði og sæti fyrir botn- og flotvörpu hlera.

Nú er lokið við að hanna breytingar á fjórum norskum nótabátum sem Navis tók að sér í samvinnu við verkfræðistofuna Vik-Sandvik í Noregi. Bátarnir, sem voru liðlega 27 metra langir hafa verið lengdir um 6 til 10 metra.

„Þátttakan í sjávarútvegssýningunni gekk vel og sýndi okkur, sem nú tókum þátt í henni í fyrsta skipti, að það skiptir máli að vera með,“ segir Hjörtur Emilsson framkvæmdastjóri Navis um nýafstaðna sjávarútvegssýningu. Hjörtur segir fjölda innlendra og erlendra gesta hafa heimsótt bás Navís og að þeir hafi verið áhugasamir um að kynna sér þjónustu Navís. 

„Það er enginn spurning að Navis  á mikið erindi á íslensku sjávarútvegssýninguna  því hér kynnum við þá fjölbreyttu þjónustu og ráðgjöf sem við erum  að veita fyrirtækjum  í sjávarútvegi. Nánast allir sem tengjast sjávarútvegi á Íslandi koma á sjávarútvegssýninguna og þess vegna er hún  góður vettvangur til að hitta menn í greininni bæði  núverandi viðskiptavini og tilvonandi,“segir Hjörtur Emilson framkvæmdastjóri Navis sem nú tekur þátt í íslensku sjávarútvegssýningunni  í fyrsta skipti frá því fyrirtækið  var stofnað árið 2003. 

Haraldur V. Noregskonungur hefur sæmt Agnar Erlingsson,skipaverkfræðing hjá Navís hinni konunglegu norsku heiðursorðu (Den kongelige norske fortjenstorden) fyrir að hafa um margra ára skeið unnið ötullega að því að þróa og efla náið samstarf Íslands og Noregs. Agnar sem er einn af stofnendum Navís var um árabil aðalræðismaður Noregs á Íslandi.