Ráðgjafarfyrirtækið NAVIS ehf. sinnir fyrst og fremst verkfræðiþjónustu er varðar skip, skipasmíðastöðvar, útgerð, fiskvinnslufyrirtæki, og skyldan rekstur. Starfsmenn búa að mikilli reynslu í sínu fagi sem aflað hefur þeim yfirgripsmikillar þekkingar, kunnáttu og faglegrar viðurkenningar hérlendis og erlendis.

Starfsmenn NAVIS hafa séð um nýhönnun á ýmsum gerðum skipa,  svo sem togurum, nóta- og flotvörpuskipum, frysti- og fullvinnsluskipum, línu- og handfærabátum, dráttarbátum og mælingarbátum. Þá hafa þeir séð um fjölda breytinga á eldri skipum, breytingar og nýhönnun á vinnslulínum og komið að fjölda annarra mismunandi verkefna á sínum sérsviðum.

Helsta þjónusta í boði:

• Skipahönnun; breytingar og nýsmíði.
• Eftirlit og umsjón með viðgerðum, breytingum og nýsmíði.
• Gerð útboðsganga, smíða- og verklýsingar.
• Val á vélbúnaði.
• Vinnslulínur.
• Kostnaðaráætlanir.
• Hallaprófanir stöðugleikaútreikningar og BT-mælingar.
• Ástandsskoðanir við kaup, sölu eða leigu skips.
• Úttektir af ýmsu tagi t.d. “Draft eða Bunker Survey”
• Þykktarmælingar.
• Tjónaskoðanir og matsgerðir.
• Ráðgjöf varðandi ISM- og ISP-kóða.
• Alhliða ráðgjöf varðandi skipa- og vélaverkfræði.

NAVIS ehf. varð til í ársbyrjun 2004 þegar verkfræðistofurnar NAVIS ehf og Fengur ehf sameinuðu krafta sína.  Báðar verkfræðistofurnar hvíldu reyndar á gömlum meið að segja má, en Fengur ehf rekur ættir sínar liðlega tvo áratugi aftur í tímann og NAVIS ehf var stofnsett í ársbyrjun 2003 af nokkrum fyrrverandi starfsmönnum Skipatækni ehf til tuga ára að meginhluta.

Hjá þessu tiltölulega nýja fyrirtæki starfa því hæfir einstaklingar sem mynda mjög sterka heild á sviði sjávarútvegs og skipasmíða.